مشعا... ومحو الامّيه ( صورة شعبيّه )

مشعا... ومحو الامّيه ( صورة شعبيّه )
مشعا... حرمتن ماشالله عليها قايمتن برجلها وبيتها . وطبخها ماعندك بأحلا منه ا لى نصبت ذاك المرقوق ثمّن جفته على الصحن ما ودك ترفع يدك عنه وفي الفزعات ماهيب تقصّر الى بغتها وحدتن من خواتها والاّحريم الجيران في العزايم تعاونهم هبّت ريح تصول وتجول معهم في المطبخ ...وهذا اللي خلاّها تحسبنّها كلشن تعرفه ...

يوم صار عمر بكريتها (الدّانه) الساتّه ادخلها ابوها للمدرسه .. وبدت الصغيره تشغل امها

في حلّ الواجب والام شطارتها في الطباخ لكن الخط ماتفكه ...

واحتارت هالبنيه ...في دروسها.. لاهيب عارفتن تحّل واجبها معها ولاحولها احدن يذاكرلها والبنيّه عيّت تروح لخالتها تذاكر مع بناتها ... وش الدّبره ...
قعدت مشعا مع حريم الجيران الضحى ... يقشّمون حب مالح واباريق الشاهى والغجر تشال وتحطّ ... والسواليف أي شي ..اللي عندها سالفتن تهــذّها قالت (ام على ) : هاه وشلون الدانه ودراستها...

ردت ام الدانه: ذكرتيني يا وخيتي والله انها متعبتني تبي من يحلّ واجباتها وانا ماعرف شي.

شاركتهم الحديث جارتهم المصريه ام اشرف : طب ماتدخلي محو الاميه .

مشعا- هوه.. ادرس ..ومن بيسوّي غدا ابو عيالي .

ام اشرف : دول بيدرسوا بعد العصر... وجارتنا ام راشد بتدرس معاهم واهي ما شا لله عليها دلوقتي بتعرف تقرا وتكتب .

باقي الحريم كان رايهم من راي ام اشرف اللي تبرّعت انها تروح معها عشان تسجل وقالت لها: بس جيبي معاكي صوره الحفيزه . وماتنسيش تشتري الام ودفاتر وكمان برّايه .

راحت ام الدانه عقب العصر ومعها صورة الحفيظه عقب ما كلمت رجلها ... ومعها ام اشرف .

دخلت على المديره وطلبت التسجيل ..المديره خذت الصوره وعطتها بعض الاوراق عشان يعبيها رجلها ... وقالت لها المديره: ما فاتك الا شي بسيط ...بنحاول نعوضه لك .وتعالي من باكر ...

انتظمت ام الدانه في المدرسه واشغلت رجلها بسوال اللي ماتعرفه ..وعقب ستت اشهر ...بدت تسلك وتفهم بعضات الشي .. وعرفت تكتب اسمها.. وتبرّق في التلفزيون وتلاحق الترجمه العربيه للافلام غديها تعرف لو كلمه...

واذا شافت ورقه جريده منطولتن في الشارع وهي رايحه او جايه من المدرسه ..التفتت ثمّن طمّـنت وخذتها..وفي البيت .. تفرشها على الارض وتنسدح وتقعد تناظر المكتوب تحت الصوره ..

آخــرالسنه عطوها الشهاده ناجحه من اولى مكافحه ونتيجتها ..هه.. حليوه.. وتشجعت الحرمه ونوت تواصل وبنيّتها الدانه لقت من يرد عليها وامها صارت تستفيد من دروس بنتها في الحساب والهجا .. وتردد مع بنتها الاناشيد من كتاب المحفوظات .

السنه الثانيه كان معها في الفصل ثنتين قبلهم مهاوش وحدتن منهن ممروره .. ياويل اللي يقعد محلها في الماصه .. تقول شاريتها.. والاّ احد يفتح شنطتها الى راحت تشرب .. والابلا.. المسكينه اصغر منهم كلهم ..الى قاموا يصجّون ظهرت من الفصل وخلّته لهم..

هذاك اليوم وصّتهم الابلا كل وحده تجيب معها قطعة قماش عشانها بتعلمهم التفصيل ..

مشعا... دوّرت بين هالخلاقين الين لقت لها خرقتن تصلح للمدرسه ..غسلتها وكوتها ورفعتها .. عقب العصر راحت للمدرسه ..بدون الخرقه.

وفي حصة التدبير كل الحريم طلّعوا خرقهم الاّ هى وسألتها البلا : مشعا وين القماشه ؟

وقفت مشعا على حيلها وقالت للابلا : والله يا ابلا...

حضّرتناها

وغسلتناها

وكويتناهــا

ورفعتناهــا

بس انى ياا بلا.. ما غير... نسيتناها ..

وكعّوا الحريم كلهم بالضحك .. والابلا تشّــر ... لهم ... يسكتون .

والعيّاره ام ( رهيّه ) ما خلّتها لها : ...التفت عليها وقالت لها : خلاص اقعدى يا ام تناها .

ردت عليها( هشلا ) رفيقة مشعا: اقعدي ياام البيوز لايجيك علمن ثانى ..

والفصل ما بين اللي تضحك واللي تشارك بالحكى والابلا ضايعتن بينهن..

وآخر شي... سكتوا بس وشّو عقبه ...

الله يهديك يا مشعا... هاللي قلتيه مهوب حكى هذا قصيد

لكن وش تقول ...هذي مشعا... ومحو الاميّه .



أبو جمال ( حبيب العمر ) .. رمضان 1423 هـ
جميع الحقوق محفوظة للمؤلف 1423هـ